Հանրային ընտրության տեսություն
Մինչ այժմ էլ չլուծված է մնում էլիտար տեխնոկրատի և քաղաքագետի հակասական դերերի
խնդիրը քաղաքականության կերտման գործընթացում: Քաղաքականության կերտման ո´չ
պրակտիկան, և ո´չ էլ ուսումնասիրությունները չեն կարող լինել դեմոկրատական, եթե
այն շարունակվի իրականացվել բացառապես քաղաքական էլիտաների կողմից: Այստեղ գխավորը
մասնակցության խնդիրն է, այսինքն, ովքեր պետք է մասնակցեն քաղաքական որոշումների
ընդունմանը, և ինչպես պետք է այդ որոշումները կյանքի կոչվեն: Հանրային ընտրության
տեսությունը, ըստ էության, նեոդասական տնտեսագիտական գաղափարների կիրառումն է
հանրային սեկտորում, հիմնական գաղափարը կայանում է հետևյալում. շուկայի
գործունեության տրամաբանությունը և տեսությունը տեղափոխել քաղաքական դաշտ: Այս
տեսության համաձայն` կառավարությունները պետք
է տրամադրեն հանրային ծառայությունները և ծրագրերը մասնավոր սեկտորի
նմանողությամբ: Այլ կերպ ասած` պետք է արձագանքեն իրենց
<<հաճախորդների>> պահանջներին: Քաղաքացիները` հաճախորդները, պետք է
ունենան իրավունք և հնարավորություն կատարելու ընտրություն իրենց մատուցվող
ծառայությունների և ծրագրերի միջև, ինչպես նաև տեղեկանալու դրանց մոտավոր արժեքի
մասին: Հենց սա էլ թույլ կտա կառավարություններին բարձրացնելու մատուցվող
ծառայությունների և ծրագրերի որակը և մատուցման արդյունավետությունը: Հանրային
ընտրության ամենավաղ տեսական հիմնավորումը տվել է Charles Tiebout (1956)-ն, ով տվել է տեղական ինքնակառավարման իդեալական
կառուցվածքը. ցանկացած համայնքի կարևորագույն խնդիրը իր քաղաքացիներին
ծառայություններով ապահովելն է: Այդպիսի ծառայությունները օրինակ, ջրամատակարարումը,
աղբահանությունը, ոստիկանության աշխատանքը, հրշեջ ծառայությունը և այլն հանդես են
գալիս՝ որպես հանրային բարիքների ապահովում: Եվ քանի որ այսպիսի հանրային
բարիքները չեն կարող բաժանվել առանձին համայնքների միջև. դա է պատճառը, որ դրանք
ավանդաբար թողնվում են կենտրոնացված իշխանական կառուցվածքների լիազորություների
շրջանակում: Իրենց հերթին էլ կենտրոնացված կառուցվածքները քանի որ ունեն մոնոպոլ
իրավունք մատուցելու այդ ծառայությունները, աննշան է դառնում նրանց մոտիվացիան
արձագանքելու քաղաքացիների պահանջներին: Արդյունքում ընկնում է մատուցվող
ծառայությունների որակը: Հանրային ընտրության շրջանակներում մի խումբ մասնագետների
նախաձեռնությամբ առաջ է քաշվել մի ծրագիր, որը գլխավորապես ուղղված էր բարելավելու
մատուցվող հանրային ծառայությունների որակը: Առաջարկվում էր, որպեսզի հանրային
բարիքները արտադրվեին և մատուցվեին ոչ թե կենտրոնական կառավարության կողմից, այլ`
առանձին համայնքների: Եվ յուրաքանչյուր քաղաքացի կարող էր ազատ ընտրել այն
համայնքը, որում մատուցվող ծառայությունները կհամարեր ամենաորակյալը: Ինչն էլ իր
հերթին պետք է խթաներ, որպեսզի առանձին համայնքների կառավարությունները
արձագանքեին իրենց հաճախորդների կարիքներին և մատուցեին ավելի լավ
ծառայություններ: Սակայն այս մոտեցումը ունեցավ նաև շատ քննադատներ, ովքեր իրապես
գտնում էին, որ այսպիսի ընտրությունը կարծես թե կատարվում է իդեալական
պայմաններում, երբ քաղաքացին ազատ է տեղաշարժվելու և ընտրելու իր բնակության
վայրը, և երկրորդը, այս մոտեցումը ենթադրում է, որ յուրաքանչյուր քաղաքացի կարծես
թե պետք է ունենա լիարժեք, հավաստի և ամբողջական ինֆորմացիա ոչ միայն իր, այլ նաև
մյուս համայնքներում մատուցվող ծառայությունների մասին: Փաստորեն, վերը նշված
մոտեցումը լուրջ թերություններ ունի, քանի որ քաղաքացին միայն իր ցանկությամբ և
շատ հեշտությամբ չի կարող փոխել իր բնակության վայրը. կան նրան զսպող բազմաթիվ
հանգամանքներ, օրինակ աշխատանքի տեղավորման խնդիրը և մի շարք այլ սահմանափակող
հանգամանքներ: Ինչ վերաբերում է տեղեկացված լինելուն, ապա պետք է նշել, որ
սովորաբար տեղեկացված է լինում բնակչության միայն մի փոքր հատվածը, որն ունի
բավականաչափ ռեսուրսներ և ժամանակ ինֆորմացիա փնտրելու և գտնելու համար: Սա սովորաբար
բնակչության բարձր եկամուտներ ունեցող հատվածն է: Հանրային ընտրության օրինակ
կարող է ծառայել նաև այն, թե ինչպես են ծնողները որոշում կայացնում իրենց
երեխաների դպրոցի ընտրության վերաբերյալ. այստեղ, որպես չափանիշներ, հանդես են
գալիս և´ տվյալ դպրոցի ակադեմիական ցուցանիշները, և´ տեղանքը, և´ ծնողների
սուբյեկտիվ նախասիրություններն ու ընկալումները, որոնք ոչ միշտ կարող են լինել
բանական և ռացիոնալ: Այստեղ հակասության առջև են կանգնում քաղաքականություն
մշակողները. Արդյոք, որպես քաղաքականության հիմք, վերցնեն այն, ինչ ցանկանում են
բնակիչների մեծ մասը, թե այն, ինչ իրենք են իրենց մասնագիտական գիտելիքների
օգնությամբ համարում ճիշտ և օգտակար բնակչության համար:
Комментарии
Отправить комментарий