Ռացիոնալ ընտրության տեսություն
Ռացիոնալիզմի դիքերից քաղաքականությունը մի գործընթաց է, երբ ուսումնասիրվում
են որոշակի հարցերի լուծման և նպատակների հասնելու այլընտրանքային
քաղաքականություններ, և կարևորագույն խնդիրը այդ վերջնարդյունքների ապահովման
ամենացանկալի միջոցների ընտրությունն է: Այդ միջոցների ընտրությունը բավականին
բարդ տեխնոկրատիկ գործընթաց է, որը շատ հաճախ կրում է միջդիսցիպլինար բնույթ,
պահանջում է կիրառել ինչպես քանակական մեթոդներ, այնպես էլ բացատրել մի շարք
պատահական և ոչ պատահական կապեր ու փոխհարաբերություններ: Ռացիոնալիստական
մոտեցմամբ քաղաքականության գործընթացը բաժանվում է մի քանի փուլերի
1.
Խնդրի սահմանումը-այն վիճակն
է, որը կշարունակի մնալ չբավարարող և ոչ ցանկալի այնքան ժամանակ, մինչև չլինի
կառավարության միջամտությունը,
2.
սահմանել գործողության և
միոցառումների այլընտրանքային տարբերակները, սա նշանակում է քաղաքականության մի
քանի տարբերակների մշակում, որոնք կունենան ցանկալի ազդեցությունը հիմնախնդրի
լուծման ուղղությամբ, այլընտրանքները հիմնախնդրի հետ կապելը պատճառական կապի
օրինակ է, եթե կառավարությունը անի X, ապա տեղի կունենա Y-ը: Եվ ռացիոնալիստները
մեծապես հենվում են սոցիալական գիտությունների վրա` հասկանալու այս պատճառական
կապերը:
3.
Չափել արդյունքները,
նշանակում է մշակել միասնական չափանիշներ, որոնցով պետք է գնահատվեն
քաղաքականության այլընտրանքները, առաջնային կարող են լինել տարբեր չափանիշներ,
օրինակ ծախսերի կրճատում, կոնկրետ վերջնարդյունքի ապահովում կամ եկամուտների
բաշխում,
4.
Այլընտրանքների համեմատում,
նշանակում է քաղաքականությսն այլընտրանքային տարբերակների համեմատություն հենց այն
չափանիշների հիման վրա, որոնք հաստատվել էին երրորդ քայլով,
5.
Ընտրել լավագույն
այլընտրանքը, որը թույլ կտա ապահովել լավագույն արդյունքը, այնուհետև վեր է ածվում
կառավարության գործողության, հանրային քաղաքականության:
Եվ ասյտեղ ահա´,
քաղաքականության վերլուծաբանների խնդիրը հետևյալն է. հնարավորինս օբյեկտիվ
գնահատականներ տալ այլընտրանքներին` պատասխանելով հարցին, թե դրանցից որը կաշխատի,
որը՝ ոչ: Փորձագետի խնդիրն է նաև տվյալ խնդրի լուծման համար մշակել և ապահովել
անհրաժեշտ տեխնիկական բազա, ընտրել համապատասխան մեթոդներ և տեսություններ
հաճախորդների կարիքների բավարարման համար:
Ռացոինալիստական տեսության մեջ կա չափման
խնդիր, այսինքն, ինչպես պետք է չափվեն տրված այլընտրանքները. այստեղ խնդիրը
բավականին բարդ է, քանի որ վերլուծաբանի սուբյեկտիվ մոտեցումներն ու
դատողությունները կարող են բավարար չլինել քաղաքականության որևէ այլընտրանքի
արժեքը հասկանալու համար, որը ներկայացնում է հանրության շահերը: Սակայն այստեղ
լիովին բացառել սուբյեկտիվիզմը անհնար է, քանի որ վերլուծաբանի անհատական որակները
այպես թե այնպես, շատ կամ քիչ չափով արդեն ներկայացվում են քաղաքականության
մշակման, գնահատման և իրականացման բոլոր փուլերում: Վճռորոշ դերը պատկանում է հենց
այն չափանիշներին, որոնք քաղաքականության մշակման ժամանակ հաստատվում են, օրինակ,
եթե հիմնական նպատակը կրթական համակարգի բարեփոխումն է, ապա չափանիշը դառնում է
յուրաքանչյուր առանձին քաղաքականության ունեցած ազդեցությունը կրթական գործընթացի
վրա, ինչի միջոցով էլ համեմատվում են քաղաքականության այլընտրանքները: Ցավոք սրտի,
պրակտիկայում այն խնդիրները, որոնք պետք է լուծվեն քաղաքականության միջոցով, շատ
հաճախ չեն ունենում նախապես համաձայնեցված, սահմանված, հեշտ չափելի, եզակի նպատակ:
Հանրային քաղաքականության այլընտրանքերի համեմատությունը նույնական է որոշակի
արժեքների համեմատությանը: Շատերը կհամաձայնեն, որ հանրային քաղաքականությունը
կոչված է ապահովելու սոցիալական բարեկեցություն, այն իրենից պետք է ներկայացնի
որոշումներ և գործողություներ, որոնք համապատասխանում են հանրային շահին: Սակայն
այստեղ անխուսափելի հարց է առաջ գալիս, թե ինչպես պետք է սահմանվի, չափվի
սոցիալական բարեկեցությունը կամ հանրային շահը: Եվ առաջարկվում է քաղաքականության
այլընտրանքները համեմատել որոշակի արժեքայնության դիրքերից: Այլընտրանքների
գնահատման համար հաճախ կիրառվում է տնտեսական բարեկեցության պարադիգմը: Այս
պարադիգմը զուգահեռներ ունի քաղաքականության վերլուծության ռացիոնալիստական
մոտեցման հետ: Տնտեսական բարեկեցության պարադիգմը հենվում է մեթոդաբանական
ինդիվիդուալիզմի վրա` գտնելով, որ անհատները ռացիոնալ դերակատարներ են, նրանք
ամենալավը գիտեն իրենց պահանջները և ցանկությունները և ամեն կերպ փորձում են
մաքսիմալ կերպով դրանք բավարարել:
Քաղաքականության ցանկացած լավ վերլուծություն պետք է
տրամադրի քաղաքականության վերաբերյալ այնպիսի արժեքավոր ինֆորմացիա, որը
հետագայում կարող է օգտագործվել քաղաքականության պրակտիկների կողմից: Ամենաստորին
մակարդակում հանրային քաղաքականությունը որոշումների կայացման ուսումնասիրություն
է: Հանրային քաղաքականություններն, ի վերջո, իրենցից ներկայացնում են պետության
լիազոր ուժերի կողմից կատարված ընտրությունը: Կարևոր հարցադրումներն են. ո՞վ է
կայացնում որոշումները, և ինչպե՞ս են կայացվում այդ որոշումները: Շատ դեպքերում
այս հարցերին տրվում են պատասխաններ ռացիոնալ ընտրության տեսակետից. Այս առումով,
միշտ էլ կատարվում է ընտրությունը` հօգուտ ամենաարդյունավետի և օբյեկտիվի: Սակայն լիարժեք ռացիոնալ
ընտրությունը շատ դեպքերում պարզապես անհնարին է, որովհետև մի շարք քաղաքական
հարցեր պահանջում են անհապաղ լուծում, իսկ որոշում կայացնողներն ունեն սահմանափակ
ռեսուրսներ, սահմանափակ ժամանակ, ինֆորմացիա և վերջապես սահմանափակ մտավոր
ունակություններ` քննարկելու բոլոր այլընտրանքային տարբերակները և ընտրելու
ամենառացիոնալը: Սակայն սա ամենևին չի նշանակում, որ որոշումների կայացման
գործընթացը իռացիոնալ է, ո´չ, եթե այն ամբողջովին չի համապատասխանում ռացիոնալ
ընտրության չափանիշներին, ապա ամենաքիչը նպատակաուղղված / goal-oriented/ գործունեություն է, և այդ է պատճառը, որ չի կարող
համարվել իռացիոնալ:
Комментарии
Отправить комментарий