Հանրային կառավարման տեսության զարգացման
3-րդ ժամանակաշրջանը սկսվեց 1950-ան թթ. և շարունակվեց մինչև 20դ. վերջը: Այդ ժամանակաշրջանի
առավել ազդեցիկ ուղղություններից էին հանդիսանում վարքաբանական, համակարգային և իրավիճակային
մոտեցումները:
Այնպիսի գիտությունների զարգացումը ինչպիսիք
էին հոգեբանությունն ու սոցիոլոգիան և Երկրորդ համաշխարհային պատերազմից հետո հետազոտական
մեթոդների կատարելագործումը նպաստեցին կազմակերպության աշխատակիցների վարքի գիտական
ուսումնասիրությանը: 1950-60-ան թթ. առավել ազդեցիկ դեմքերից էին Հ. Սայմոնը, Դ. Սմիտցբերգը,
Դ. Իստոնը, Վ. Թոմսոնը, ովքեր սկսեցին մշակել պետական կառավարման նոր վարքաբանական
մոտեցումը: Դրական առումով նրանց աշխատանքների յուրահատկությունը կայանում է նրանում,
որ հեղինակները ձգտել են կառավարման գիտության հիմքում դնել ժամանակակից սոցիալական
հոգեբանության և սոցիոլոգիայի ձեռքբերումները և ներկայացնել ադմինիստրատիվ հաստատությունների
իրական գործառնությունը դրանցում աշխատող անհատների և խմբերի վարքագծի վերլուծության
միջոցով:
Վարքաբանական գիտությունների դպրոցը մի փոքր
հեռու էր գնացել մարդկային փոխհարաբերությունների դպրոցից, որն ուշադրությունը կենտրոնացրել
էր միջանձնային հարաբերությունների կարգավորման մեթոդների վրա: Նոր մոտեցումը մեծ մասամբ
տարբերվում է այն առումով, որ ձգտում է օժանդակել պետական ծառայողներին գիտակցելու
իրենց սեփական կարողությունները պետական հաստատություններում վարքաբանական գիտության
հնարքների կիրառման դեպքում: Ընդհանուր առմամբ այդ դպրոցի հիմնական նպատակը կազմակերպության
արդյունավետության բարձրացումն է նրա մարդկային ռեսուրսների արդյունավետության հաշվին:
Վարքաբանական մոտեցման շրջանակներում գիտնականնները
հետազոտել են սոցիալական փոխազդեցության, մոտիվացիայի, պետական կառավարման ոլորտում
իշխանության էության և հեղինակության տարբեր ասպեկտներ: 1960-ան թթ. առավել հայտնի
ուղղությունը վարքաբանական մոտեցումն էր, որը ավելի վաղ դպրոցների նման շեշտադրումը
կատարում էր կառավարման խնդիրների լուծման «ամենաարդյունավետ եղանակների վրա»: Նրա
գլխավոր կանխադրույթից հետևում է, որ վարքաբանական գիտության ճիշտ կիրառման պարագայում
կբարձրանա ոչ միայն առանձին աշխատակցի, այլև` պետական կառավարման համակարգի աշխատանքի
արդյունավետությունը:
Ամերիկացի քաղաքագետ Դ. Իստոնը, համակարգելով
բիհեվիորիզմի հիմնական գաղափարները, առաջարկել է վարքաբանական մեթոդոլոգիայի 8 հիմնական
սկզբունքներ:
Դրանք որպես կանոն կարելի է ներկայացնել հետևյալ
կերպ.
1. Օրինաչափությունների սկզբունքն է,
ինչը ենթադրում
է, որ հետազոտության օբյեկտներ պետք է հանդիսանան ոչ միայն ինստիտուտներն ու պետական
կառավարման ֆորմալ ասպեկտները, որքան օպտիմալ կառավարմանն ուղղված մարդկանց գործողությունները:
Ղեկավարման պրոցեսում մարդկանց վարքի մեջ կարելի է բացահայտել պարբերաբար կրկնվող բաղադրիչներ,
որոնք վարքաբանական տեսության շրջանակներում ենթարկվում են ընդհանրացման և սիստեմատիզացիայի:
2. Վերիֆիկացիայի սկզբունքն է: Ըստ էության նմանատիպ ընդհանրացումների
հավաստիությունը կարելի է անել համապատասխան վարքի դիտարկման պարագայում:
3. Մեթոդիկայի սկզբունքն է, ինչը ենթադրում է, որ տվյալների
հավաքագրման և մեկնաբանման միջոցները չպետք է անմիջապես ընդունվեն, այլ պետք է հիպոթետիկ
լինեն: Դրանք պետք է հանգամանալից ուսումնասիրության, հստակեցման և ընտրության ենթարկել,
որպեսզի արդյունքում հանգել դիտարկման և վերլուծության համապատասխան մեթոդներին:
4. Քանակական մեթոդների սկզբունքն է:
Դրանց օգտագործումը
չպետք է ինքնանպատակ լինի: Դրանք պետք է կիրառվեն այնտեղ, որտեղ կարող են պրակտիկ օգուտներ
տալ:
5. Արժեքների սկզբունքն է, ինչը ենթադրում է որ բարոյական գնահատականն
ու էմպիրիկ բացատրությունը կապված են մտածողության երկու տարբեր տիպերի հետ, որոնք
գիտության շահերից ելնելով պետք է տարանջատվեն:
6. Սիստեմատիկության սկզբունքն է, ինչը ենթադրում է, որ հետազոտությունները
պետք է համակարգված լինեն, այսինքն տեսականն ու էմպիրիկը պետք է դիտարկել որպես կոնկրետ
և կանոնակարգված ճանաչողության փոխկապակցված մասեր:
7. Մաքուր գիտության սկզբունքն է: Կառավարման գործընթացում վարքագծի
գիտակցումն ու ընկալումը տրամաբանական առումով պետք է նախորդի հանրային կառավարման
ակտուալ խնդիրների լուծմանն ուղղված հանձնարարականների մշակման պրոցեսին:
Ինտեգրացիայի
սկզբունքն է: Քանի որ հանրային կառավարումը տարբեր ձևերով կապված է մարդկային
գործունեության տարբեր կողմերի հետ, ուստի անթույլատրելի է համարվում հետազոտություններում
այլ հասարակական գիտությունների եզրակացությունները: Նման փոխկապվածության ընդունումը
պետք է նպաստի հանրային կառավարման տեսության` փիլիսոփայության, սոցիոլոգիայի, հոգեբանության
և քաղաքագիտության հետ մերձեցմանը:
Комментарии
Отправить комментарий